Waorum de Herfshane?
Jôngere tösse de 16 en 25 jaor laote zich döks neet zeen op podia en al hielemaool neet as 't um vastelaovend geit. Buuttereedners en vastelaoveszengers (m/v) waere euver 't algemein neet ech "cool" gevônde. Jaomer, want d'r zit vuuël "joeks" en talent beej de jôngere in Venlo. Eine groep, dae zich de Herfshane neump, stik de joeks daorum in ein niej jeske, of "pimpe de joeks" zoë asse 't zelf gaer neume.

Wae zien de Herfshane?
De Hershane zien vertaegewoordigers van 'nnen haup verschillende jôngeregroepe. Beejveurbeeld van Neet Näöle, Zoemaar, De 3-kes, Jocus-toekôms, D’n Heiten Haspel, de Frette, en aafgevaardigde van de veer groëte schoële, Wel.kom, de gemeinte en kemmissies van Jocus. Sinds 29 oktoëber 2007 zien de Herfshane officieel georganiseerd in 'n stichting. 't Dageliks bestuur bestuit oét:

• Loes Hermans, veurzitter
• Twan Toma, vice veurzitter
• Sanne Toma, sikketaris
• Bas vd Zanden, penningmeister
• Toine Schreinemachers, 2e penningmeister

Aktiviteite
De Herfshane organiseerde de aafgeloupe jaore diverse aktiviteite veur de jeug. Waat te dinke van de Bling Bling Party en ’t Ketjesbal: idders kiër ‘n ônvervals vastelaovesfees veur jônk talent op ein podium örges in de binnestad. Iërs beej de Avenue en de aafgeloupe jaore beej Baer de Woers. De aafgeloupe jaore hebbe un fors aantal kanjers de groëte buun bereik dankzij de initiatieve van de Herfshane.

Dit jaor gans niej!!
Dit jaor doon de Herfshane d'r nog un schöpke baovenop. Weej organisere in november 2009 veer Masterclassess ônder leiding van Frans Pollux en Kim Boots. Dees aovende waere gehalde in 't Ald Weishoes op 9, 16, 23 en 30 november vanaaf 20.00 oor. Begeleiding mit 't schrieve van tekste, podium-performance, zang en prissentasie behuure tot de meugelikheeje.

Daonao gaon de aspirant artieste deilneme aan unne toefte aovend op 7 jannewarie 2010 beej de Loco, wao zeej eur dingk gaon doon veur unne vakzjurie. De oetintelikke winnaer(s) van daen aovend zulle aansloetend de gelaegenheid kriege um verschillende groëte podia in Venlo te beklumme, dit siezoen en netuurlik auk nog 't volgende siezoen. Veur kundige begeleiding van de nieje artieste tiedes deze triômftoch wuurt gezörreg door de Herfshane, zoëdetse d'r neet gans allein veur steis. 

Wae dörf meug zinge, 'nne buut of parodie bringe, of op ein andere manier zien kreativiteit in vastelaovesjoeks toëne. Belangstellende kinne  zich aanmelde via deze website. 

DOON.....ASSE DÖRFS!!!!